DVR, NVR və XVR nədir və aralarındakı fərqlər
Təhlükəsizlik kameraları qurarkən ən çox qarşılaşdığımız suallardan biri DVR, NVR və XVR cihazlarının fərqinin nə olduğudur. Bu cihazların hamısı kamera görüntülərini yazmaq və saxlamaq üçün istifadə olunur, lakin işləmə prinsipləri və uyğun olduqları kamera növləri fərqlidir.
DVR nədir?
DVR (Digital Video Recorder) təhlükəsizlik kameralarının görüntüsünü yazmaq və saxlamaq üçün istifadə olunan qeyd cihazıdır. DVR sistemləri ən çox analoq kameralarla istifadə olunur və kameralar cihazına adətən koaksial kabel vasitəsilə qoşulur.
Müasir DVR modellərinin bir çoxu hibrid işləmə imkanına malikdir. Bu səbəbdən bəzi DVR cihazlarına həm analoq kameralar, həm də müəyyən sayda IP kameralar qoşmaq mümkündür. DVR cihazları internetə qoşulduqda uzaqdan idarəetmə və mobil tətbiq vasitəsilə görüntüləri izləmək də mümkün olur.
NVR nədir?
NVR (Network Video Recorder) əsasən IP kameralar üçün nəzərdə tutulmuş qeyd cihazıdır. IP kameralar görüntünü şəbəkə vasitəsilə birbaşa NVR cihazına göndərir və görüntü burada yaddaşa yazılır.
NVR cihazlarına analoq kamera qoşmaq mümkün deyil və bu sistem yalnız IP kameralarla işləyir. NVR modelləri iki əsas növə bölünür: adi NVR və PoE NVR.
PoE NVR cihazlarında daxili PoE portları olur və IP kameralar birbaşa NVR cihazına qoşula bilir. Bu halda əlavə PoE switch istifadə etməyə ehtiyac qalmır.
XVR nədir?
XVR müxtəlif kamera texnologiyalarını dəstəkləyən universal qeyd cihazıdır. Bu cihazlar analoq kamera texnologiyalarını dəstəkləməklə yanaşı, bəzi modellərdə IP kameraların da qoşulmasına imkan verir.
XVR cihazları xüsusilə Dahua kimi istehsalçılar tərəfindən geniş istifadə olunur və köhnə analoq sistemləri modernləşdirmək üçün uyğun seçim hesab edilir. Bu cihazlar da internet vasitəsilə uzaqdan idarə edilə və mobil tətbiqlər üzərindən izlənə bilir.
DVR, NVR və XVR arasındakı əsas fərq nədir?
DVR, NVR və XVR cihazlarının əsas fərqi onların dəstəklədiyi kamera texnologiyasıdır. DVR və XVR cihazlarına analoq kameralar qoşmaq mümkündür və bəzi modellər IP kameraları da dəstəkləyir. NVR isə yalnız IP kameralar üçün nəzərdə tutulmuş qeyd cihazıdır.
Bundan əlavə, PoE dəstəyi olan NVR cihazlarında kameraları birbaşa cihazın portlarına qoşmaq mümkündür və əlavə PoE switch istifadə etməyə ehtiyac olmur.